Gamal gangar

I hardingfeleverket står denne slåtten oppført som Gangar etter Kolsruden. Der er Kjetil Løndal kjelda for forma, som han har etter Anund Haugan frå Heddal. Oppskrivar er Eivind Groven. Eit anna namn på slåtten er Maris minne. Det finst òg opptak med Anund Haugan si framføring av denne slåtten, og eg har lært slåtten etter dette opptaket, der slåtten vert introdusert som "Gamal gangar". Oppskrifta i hardingfeleverket er god, men det er ingen oppskrift som kan få med alle nyansar i bogestrøk, intonasjon eller ornamentikk. Haugan har dessutan sin eigen stil, med mange fine detaljar det er verdt å prøve å lære seg. Opptaket er tilgjengeleg blant anna i Folkemusikkarkivet i Telemark, saman med fleire andre slåtter med Anund Haugan.