Kolsrudspringar

Denne springaren står oppførd i bind 6 i Hardingfeleverket med nummer 481e. Kjelde er Jon Kolbjørnsrud, og oppskrivar er Eivind Groven. Det står ikkje fleire opplysningar om slåtten i Hardingfeleverket. 481 er nummeret for alle slåttevariantane som redaktørene av Hardingfeleverket meinte høyrde naturleg saman i ein slåttekrins. Det er skrive opp fem variantar, frå 481a til e. Noko som er litt spesielt, er at oppskrivar Eivind Groven har skrive opp to variantar av denne slåtten etter same kjelda, altså Jon Kolbjørnsrud. 481d - Tru på Torgon - liknar mykje på denne springaren. Det står ikkje nokon kommentar om dette, men antakeleg har Kolbjørnsrud spela begge slåttane for Groven og presentert dei som to forskjellige slåttar. Truleg har han då høyrd og lært dei frå ulike kjelder.