Margit Langerud etter Olav Fyrileiv

Denne varianten av Margit Langerud har eg frå noteoppskrift nummer 101d i bind 1 i Hardingfeleverket. Kjelda er Olav Fyrileiv, oppskrivar er Eivind Groven. Oppskrifta er svært grundig, og slåtten er mykje meir utbygd enn dei fleste andre oppskriftene med spelemenn frå Heddal. Anund Haugan (1883-1962), Torkil Kolbjørnsrud (1888-1972) og Fyrileiv var dei viktigaste arvtakarane etter storspelemannen Ole O. Kolsrud (1821-1902), med Jon Kolbjørnsrud (1858-1954) som viktig bindeledd. Så langt eg skjøner, har alle desse tre lært Margit Langerud frå Jon Kolbjørnsrud, og kanskje har dei òg høyrt Kolsruden sjølv spele han. Forma etter Anund Haugan er den som er kjend for dei fleste i dag, som Kjetil Løndal nytta og som spelemenn i dag har lært seg. Det er interessant å høyre kor ulike formene til Fyrileiv og Haugan er, det er nesten som to ulike slåttar. Eg har òg opptak der Torkil Kolbjørnsrud spelar slåtten; forma hans liknar mest på Haugan si form, men her finst òg noko frå Fyrileiv-forma. Forma etter Anund Haugan står også i Hardingfeleverket, skrive opp etter Kjetil Løndal som nummer 165 i bind 7.