Jon Sauar og Sudsauar-Jon 

Denne innspelinga er samansett av to noteoppskrifter frå hardingfeleverket: fyrst Jon Sauar, nummer 146b i bind 3, og deretter Sudsauar-Jon, nummer 146a i bind 3. Den fyrste oppskrifta er etter Olav Frømyr, skriven ned av Eivind Groven i 1922, og med dei fire taktene må det truleg vere den korteste oppskrifta i Hardingfeleverket. Men Groven har tydelegvis høyrt noko interessant i denne forma, og antakeleg var det spennande for han å høyre att dette brotet frå ein lengre slått han har høyrd mor hans tulle. Den andre oppskrifta, Sudsauar-Jon, er nemleg etter Aslaug Groven, mor til Eivind Groven. I kommentaren til oppskrifta står det: "(Sudsauar-Jon) G. 639. Oppskr. 1920. Aslaug Groven var syster til Olav R. Berge, Rauland, og mor til komponisten Eivind Groven. Slåttenamnet etter garden Sud-Sauar i Heddal. Slåtten vart tralla eller sungen med denne teksta: Sudsauar-Jon kom tilbakars og sjå til dotter di då. Fyrst var ho så, og sidan blei ho så."
Dotterdotter til Eivind Groven, Øyonn Groven Myhren, syng denne på utgjevinga "Akkedoria frå Kristiania". Lenke til den ligg under noteoppskrifta.